Позитивно управување со училницата

Ефективното управување со училницата подразбира утврдување јасни очекувања, поттикнување односи и создавање структурирана, но пријатна атмосфера.

Наставниците може да користат позитивни методи за да ги водат своите ученици низ процесот на надминување конфликти преку примена на активно слушање, промовирање отворена комуникација, примена на инклузивни наставни практики, подучување вештини за решавање конфликти и поттикнување соработка помеѓу учениците.

Утврдување јасни очекувања и конзистентни рутини

Важно е учениците да добијат јасни правила и очекувања и конзистентни рутини, а подеднакво важно е да се задржи смиреноста и активно да се сослушаат проблемите на учениците. Конзистентноста и структурата им даваат комоција на учениците и им помагаат да ги исполнат очекувањата, да останат фокусирани и да се чувствуваат безбедни.

Рутините во училницата може да вклучуваат:

• Дневни рутини и јасно дефинирани процеси за почетокот и за крајот на училишниот ден;
• Утврдување распореди за различни видови активности во училницата и за различни предметни области;
• Рутини за други процедури во училницата, како што е употребата на опрема и преминувањето како група кон активности надвор од училницата;
• Создавање список на очекувања и рутини, и/или кодекс на однесување, што ќе биде поставен на место кое е видливо секој ден за целата паралелка;
• Дефинирани сесии кога учениците можат да дадат свој придонес.

Градење силни односи помеѓу наставниците и учениците

Наставниците може ефективно да ги решаваат проблемите работејќи заедно со учениците на решавање на конфликтите: јасно идентификувајќи ги проблематичните прашања заеднички и прифаќајќи го нивниот придонес кон потенцијалните решенија, како и обезбедувајќи совети.

Поттикнувањето доверлива, емоционално отворена средина каде учениците ќе се чувствуваат комотно да ви се обратат доколку се загрижени за нешто може да им помогне на наставниците многу побрзо да ги смират напнатите ситуации помеѓу учениците.

Активното слушање е техника којашто им покажува на учениците дека нивните ставови се вреднувани и почитувани. Во контекст на посредување во решавањето на конфликтите помеѓу учениците, активното слушање може да изгради доверба помеѓу наставниците и учениците и помеѓу самите ученици. Тоа помага да се создаде безбедна средина за учење каде учениците се чувствуваат комотно да споделат отворено перспективи коишто се разликуваат.

Примена на социо-емоционално учење

Социо-емоционалното учење (SEL) е драгоцена техника за создавање средина во училницата каде конфликтите може лесно да се решаваат. Учениците се подучуваат да користат вештини на активно слушање и други комуникациски вештини со цел интеракциите во рамки на класот да бидат јасни и позитивни и да нудат поддршка, и тие изучуваат вештини за одлучување и решавање проблеми кои треба да им помогнат во справувањето со конфликти, стресови и предизвици.

Примената на социо-емоционалното учење во управувањето со училницата им овозможува на наставниците да ги утврдат очекувањата, правилата и постапките за примена на овие вештини, и го поставува тонот на кој учениците ќе водат интеракција во рамки на училницата.

Создавање безбеден и инклузивен простор во кој владее почит

Училницата треба да биде простор каде секој ученик ќе се чувствува ценето, поддржано и омоќено да успее. Кога учениците имаат чувство на припадност, поверојатно е тие да се ангажираат, да учествуваат и да напредуваат во нивниот процес на учење.

• Ставете јасно до знаење дека врсничкото насилство, дискриминацијата или непочитувањето нема да се толерираат.
• Промовирајте почит кон различноста во сите нејзини форми – културна, јазична, од аспект на попреченост и од аспект на невродиверзитет.
• Уредете ја училницата на тој начин што таа ќе биде пријатна и удобна во однос на физичката и емоционалната безбедност на учениците.
• На директен и конструктивен начин осврнете се на конфликтите или проблемите, за да бидете сигурни дека секој ученик се чувствува безбедно.

Промовирање учење преку соработка

Наставниците можат да користат и стратегии за учење преку соработка, како што се групни проекти и врсничка медијација, туторство и групи за дискусија. Работата со врсници поттикнува чувство на заедница и им помага на учениците да учат едни од други.

Доделувањето улоги и одговорности во училницата им овозможува на учениците да дадат свој придонес и да се чувствуваат вложени во начинот на кој се води училницата. Преку ротирачки улоги се обезбедува секој да има можност да преземе одговорност и да се чувствува вреднувано.

• Поверојатно е учесниците да останат фокусирани и повеќе да внимаваат на задачата на која работат кога нивните улоги во рамки на соработката се јасни и издвоени.
• Помалку веројатно е учениците да се чувствуваат изоставени кога имаат конкретна должност којашто се задолжени да ја извршат.
• Улогите во група поттикнуваат индивидуална отчетност – поверојатно е членовите на групата да бараат отчетност едни од други за незавршување на работата.
• Рамномерно распределени улоги можат да помогнат во справувањето со стереотипни и родово дискриминирачки идеи.