Креативноста во учењето ја зголемува благосостојбата

Креативното размислување за прв пат се оценуваше како компетентност во рамки на ПИСА во 2022 година, со што се истакна новото разбирање на неговото значење во склоп на сеопфатното образование. Студијата го дефинираше како способност за продуктивно вклучување во процесот на генерирање, евалуација и подобрување на идеите.

Третиот извештај на ПИСА за 2022 година ќе се фокусира на ова оценување на креативното размислување. Ќе го испита капацитетот на учениците да генерираат оригинални и разновидни идеи и ќе испита како ставовите кон креативното размислување се разликуваат во различни земји и образовни контексти.

Извор:PISA Creative Thinking Test by OECD

Креативни педагошки пристапи со помош на уметноста

Интегрирањето на музиката, визуелните уметности, драмата и танцот во општата наставна програма ја поттикнува способноста за креативно размислување на учениците. Креативното изразување преку уметноста го подобрува когнитивниот развој и служи како форма на самоизразување и ослободување од стресот.

Проектот Colors („Бои“) зазеде когнитивен пристап, користејќи тестови за идентификување различни видови интелигенција и нивно усогласување со техниките за креативно учење. Тие вклучуваат:

• часови по музичко и работилници за ритам наменети за учениците заради ритмичка интелигенција;
• работилници за боење и работилници за дизајн заради визуелна интелигенција;
• натпревари за композиции и поезија заради вербална интелигенција.

Поврзување на учениците со учењето преку креативноста

Некои ученици имаат специфични потреби поради нивните лични околности, и поттикнувањето на нивната креативност може да им помогне да почувствуваат поврзани. Младите луѓе кои се чувствуваат како отуѓени од нивното училиште или од нивните врсници се изложени на поголем ризик од проблеми со злоупотреба на супстанции и проблеми со менталното здравје, како и предвремено напуштање на образованието.

• Проектот „To be or not be well?“ се послужи со драма и театар за да развие методи за поддршка на благосостојбата на учениците и да им помогне да се чувствуваат поврзани и ангажирани во нивните заедници и со нивните врсници.
• Проектот „CHIMES“ ги користеше музиката и танцот како средство за да се допре до маргинализираните млади луѓе кои се чувствуваат исклучени, без разлика дали тоа е поради социјални, економски, културни или лични причини или пак причини поврзани со менталното здравје, со цел да им помогне да се чувствуваат вклучени во општеството и во процесот на учење.
• Проектот „Once upon YOUR time“ го користеше проучувањето на народните приказни и митови како иновативен метод за работа со млади луѓе кои се изложени на ризик од предвремено напуштање на образованието и социјална исклученост за да се превенираат, решат и разберат нарушувачките, антисоцијалните или исклучувачките поведенија.
• Проектот „ALIISA“ имаше цел да развие инклузивна уметничка педагогија во рамки на меѓународна соработка помеѓу високото образование и општото уметничко образование.
• Проектот „Digital Director“ користеше обука за филмски вештини за да им овозможи на учениците да изработат кратки филмови за социјалните, политичките или психолошките проблеми што ги засегаат.

Креативни средини за учење: простор за истражување 

Можноста за игра, експериментирање и истражување создава атмосфера во која децата се доволно безбедни да преземат ризик и да направат грешки.

Флексибилните средини за учење, со приспособлив распоред на седење, подвижен мебел и посебен креативен простор можат да обезбедат поддршка за разновидни стилови на учење и да поттикнат соработка и иновација.

Активностите засновани на природа не само што стимулираат креативност, туку и промовираат физичка и емоционална благосостојба. Наставниците може да ја пренесат наставата надвор од училницата со едукативни искуства во природа.

Проектот „Opening the door to outdoor“ се послужи со идеи и теми специфични за секоја земја учесничка за изнесување на наставата во природа.

• Исланд: вулкани, гејзири и глечери
• Германија: математика и животна средина
• Холандија: фарма и уметнички активности во природа
• Хрватска: биологија во подземни пештери и на морското крајбрежје
• Грција: историја и демократија

Целта на проектот „Green extended classroom“ беше да се обезбеди простор за иновативни, креативни форми на учење во природа за одржливоста и здравјето.

Беа изработени тематски збирки со практичен и дигитален материјал за учење за да им помогнат на учениците да се запознаат со својата околина преку уметничка интерпретација и креативни проекти за одржливост, вклучително и меѓуучилиштен натпревар за изработка на нови маскоти на паралелките од рециклирани материјали.  

Улога за сопствената креативност на наставниците

Наставниците можат да ја користат сопствената креативност за да поттикнат интердисциплинарно учење и да поврзат различни предметни области во проектите во училницата. Ова ја промовира креативноста преку охрабрување на учениците да создаваат нови идеи и да разберат што учат во рамки на еден поширок контекст.

• Вградувањето редовни можности за размислување и повратни информации во рамки на процесот на учење ги охрабрува учениците да размислуваат за нивните креативни процеси, да ги одбележуваат нивните успеси и да учат од предизвиците.
• Обезбедувањето можности за избор и самостојност на учениците во нивното учење поттикнува чувство на ангажираност и тие го прифаќаат учењето како свое, а истовремено им овозможува и да ја истражуваат својата креативност.