Започнете го вашиот проект на еТвининг со нашите проектни комплети за 2024 година

Овие нови комплети на еТвининг нудат идеи за вашите идни проекти за сите нивоа на образование, од предучилишно до иницијално стручно образование и обука.

Разгледајте го описот на секој комплет:

Нашата нова планета: учење за граѓанство

За возраст: 5–6 години

Овој проектен комплет е осмислен за да помогне во развивањето граѓански вештини и соработка помеѓу учениците во рамки на предучилишното образование и воспитание преку создавање заедничко разбирање на вредностите, тимската работа и заедницата. Преку низа активности, децата можат да се запознаат со тоа што значи да се биде добар граѓанин и да се работи заедно на осмислување нова планета за измислен вонземјанин. Овој проектен комплет ги охрабрува учениците да размислат за нивните лични вредности, да соработуваат и да развијат чувство на одговорност и емпатија.

Разгледајте го целосниот проектен комплет

Истражувачи на еднаквоста

За возраст: 7–11 години

Овој проектен комплет покажува како да се продлабочи разбирањето на учениците за родовата еднаквост преку низа привлечни и заеднички активности. Учениците можат да изработат презентации за лица кои служат како пример, за застарени звања на работни места и за историјата на родовата еднаквост, кои ќе бидат вметнати во една заедничка книга. Активностите имаат цел да промовираат критичко мислење за родовите улоги и да поттикнат поинклузивен начин на размислување помеѓу учениците.   

Разгледајте го целосниот проектен комплет

Галерија за дигитално граѓанство

За возраст: 12–15 години

Овој проектен комплет нуди идеи за тоа како да им помогнете на учениците од средните училишта да станат одговорни дигитални граѓани. Користи интерактивни активности, како дискусии, квизови и концептни мапи, коишто им помагаат на учениците да развијат силни вештини за дигитална писменост. Тие може да соработуваат меѓународно во извршувањето на задачите, создавањето виртуелни галерии и одржувањето дневници за учење. Проектот се заокружува со уметничко попладне во рамки на кое учениците ќе го презентираат сработеното пред училишната заедница и пред локалните експерти.

Разгледајте го целосниот проектен комплет

Стручни вештини со цел: вградување европски вредности

За возраст: 15–20 години

Овој проектен комплет покажува како да се интегрираат европските вредности во рамки на стручните предмети, со што им се помага на учениците да развијат истовремено технички вештини и граѓанска свест. Преку интерактивни активности, учениците ги истражуваат врските помеѓу нивното стручно образование и фундаменталните европски вредности. На крајот од проектот, учениците можат да го покажат сработеното, презентирајќи што научиле и што разбрале од овие европски вредности. 

Разгледајте го целосниот проектен комплет

Повеќе проектни комплети и идеи може да најдете во нашата секција за проектни комплети.