Асистивна технологија за достапно образование

Придобивки од асистивната технологија

Асистивните технологии (AT) — од софтвер и апликации, па сѐ до специјализирана опрема — имаат цел да ги отстранат бариерите кај учењето и да помогнат да се создадат поинклузивни средини. Со АТ, учениците со посебни образовни потреби можат да постигнат поголема независност во индивидуалното извршување на задачите и помалку да се потпираат на помош од возрасните.

Користењето АТ им овозможува на наставниците да ги приспособат активностите на учење по мерка на индивидуалните потреби. Тоа пак може да влијае врз исходите од учењето, затоа што на тој начин учениците можат подобро да навлезат во наставната програма. АТ може воедно да ги подобри и мотивацијата и вниманието на учениците, како и да им овозможи поефективно да учествуваат во активности во училницата и во социјални интеракции.

Справување со разновидни тешкотии во учењето со помош на технологија

Различните видови асистивна технологија може да им обезбедат поддршка на учениците со разни видови попреченост (вклучително дислексија, аутизам, синдром на дефицит на внимание и хиперактивност [АДХД] и физичка попреченост).

На пример, алатки за претворање на текст во говор, како што се Read Aloud или Balabolka, им помагаат на учениците со дислексија да користат пишани материјали преку претворање на текстот во говор.

Алатките за аугментативна и алтернативна комуникација (AAC), честопати користени од ученици со аутизам или пречки во говорот, ги олеснуваат изразувањето и интеракцијата во рамки на училницата. Организаторите на задачи и апликациите за зголемување на фокусот им помагаат на учениците со АДХД да управуваат со своето време и да ги извршуваат задачите.

АТ воедно вклучува физичка помош, како што се читачи на екран, адаптирана тастатура и глувче, и слушни помагала; учениците кои ги користат овие алатки стануваат посамостојни.

Негување на компетенциите на наставниците

Ефективноста на АТ во голема мера зависи од вештините и компетенциите на наставниците. Пристапот до континуиран професионален развој за наставниците игра клучна улога, а некои проекти на Еразмус+ изработија материјали за обука и педагошки материјали за АТ за наставници.

Раната интервенција е честопати клучна за обезбедување инклузија на учениците со посебни потреби. Проектот SKATE им помогна на воспитувачите во предучилишно образование да користат асистивни и дигитални технологии со мали деца. Во рамки на проектот се изработија ресурси, како што е Рамката за компетенции на SKATE и упатствата за инклузивни училници.

Рамката за самооценување изработена во рамки на проектот ENTELIS може да им помогне на училиштата да планираат подобрувања во начините на кои може да им се помогне на учениците со посебни потреби да ја унапредат својата дигитална писменост и да ги развијат своите дигитални вештини.

Во склоп на проектот Обука на наставници и внимание кај аутизам (TTAA) беше изработен преглед на литературата, масовен отворен онлајн курс (MOOC) и апликација за тренирање за внимание.

Асистивната технологија може да помогне на учениците со попреченост или тешкотии во учењето да им се обезбедат алатките што им се потребни за успех. Вложувањето во асистивна технологија и обука на наставници помага да се создадат поинклузивни образовни средини кои нудат поддршка за учениците од сите нивоа на способност.