Kwalità Nazzjonali tal-eTwinning
Tikketti ta’ Kwalità Nazzjonali
- Il-proġett tal-eTwinning tiegħek għandu għanijiet komuni u pjan konġunt?
- Lest jew huwa fl-aħħar stadji tiegħu?
- Inti u l-istudenti tiegħek ikkontribwixxew għall-attivitajiet kollha tal-proġett?
- Inti u l-imsieħba tiegħek organizzajtu attivitajiet kollaborattivi?
- Ikkunsidrajt il-protezzjoni tad-data u tal-kwistjonijiet tad-drittijiet tal-awtur?
Jekk it-tweġiba hija IVA għall-ħames rekwiżiti kollha, mela għaliex ma tapplikax għal Tikketta Nazzjonali ta’ Kwalità?
Il-proġetti kollha huma evalwati billi jitqiesu ħames kriterji. Biex tkun eliġibbli għal Tikketta ta’ Kwalità (nazzjonali u/jew Ewropea), jeħtieġ li tikseb mill-inqas il-punti minimi stabbiliti fis-subkriterji kollha li ġejjin:
- strateġiji għall-kollaborazzjoni online fost l-istudenti mill-iskejjel imsieħba
- l-għażla u l-użu tal-ICT (l-għodod teknoloġiċi diġitali kollha)
- GDPR, id-drittijiet tal-awtur u kwistjonijiet tas-Sikurezza elettronika.
Kif tapplika?
- idħol fil-qasam tal-eTwinning fl-ESEP
- mur fi Proġetti
- sib il-proġett tiegħek u kklikkja fuq Applika għal Tikketta ta’ Kwalità
- imla l-kaxex kollha bl-informazzjoni kollha meħtieġa u agħti evidenza tax-xogħol tiegħek.
Tista’ ssegwi l-passi kollha ta’ hawn fuq għal kull wieħed mill-proġetti tiegħek li taħseb li jistħoqqilhom Tikketta ta’ Kwalità, iżda ma tistax tapplika għal aktar minn erba’ proġetti matul sena skolastika waħda.
Jekk jogħġbok innota li l-ewwel erba’ sottomissjonijiet tal-proġetti tiegħek biss se jiġu kkunsidrati u evalwati mill-NSO tiegħek. Kun żgur li tagħżel b’attenzjoni proġetti li taħseb li jistħoqqilhom Tikketta ta’ Kwalità.
Suġġerimenti utli
L-ewwel imla l-informazzjoni kollha f’dokument Word u mbagħad ikkopja u ppejstja t-tweġibiet tiegħek fil-formola tal-applikazzjoni. B’hekk ma titlifx dak li ktibt fil-formola, jekk teħodlok aktar minn 30 minuta biex timliha! Ipprovdi aktar informazzjoni għall-aspetti mhux viżibbli tal-proġett tiegħek peress li l-evalwaturi se jaraw ix-xogħol viżibbli kollu fit-TwinSpace tiegħek.
It-Tikketta ta’ Kwalità tingħata lill-għalliem u hija personali. Anke jekk taħdem ma’ kollegi oħra fl-iskola tiegħek fuq l-istess proġett, kull wieħed minnkom għandu japplika għal Tikketta ta’ Kwalità u jippreżenta kif ikkontribwixxa għall-proġett. It-Tikketta ta’ Kwalità tingħata lill-għalliema li kkontribwew b’mod attiv u viżibbli għall-attivitajiet tal-proġett.
Għaliex tapplika?
It-Tikketta ta’ Kwalità tipprovdi:
- evalwazzjoni konkreta bbażata fuq qafas pedagoġiku komuni;
- opportunità għall-għalliema biex itejbu x-xogħol tal-proġett tagħhom.
Min jagħti t-Tikketta ta’ Kwalità?
Is-Servizz ta’ Appoġġ Nazzjonali (NSO) f’kull pajjiż jevalwa l-applikazzjonijiet mill-iskejjel għat-Tikketta Nazzjonali ta’ Kwalità. It-tikketti jingħataw matul is-sena, madankollu, f’xi pajjiżi, l-iskadenzi huma ffissi, għalhekk kun żgur li tikkonsulta l-NSO tiegħek għal informazzjoni dwar l-iskadenzi f’pajjiżek. Ladarba l-applikazzjoni tiġi aċċettata jew miċħuda, l-NSO tiegħek se tikkuntattjak.
Kriterji għal Tikketti Ta’ Kwalità
Uża l-lista ta’ kontroll ta’ hawn taħt meta tippjana u timplimenta l-proġett tiegħek biex tiċċekkja jekk il-proġett tiegħek jissodisfax il-kriterji tat-Tikketta ta’ Kwalità.
Kollaborazzjoni bejn skejjel imsieħba:
- l-attivitajiet ta’ kollaborazzjoni jmorru lil hinn mill-komunikazzjoni;
- l-iskejjel imsieħba jaħdmu flimkien biex iwettqu attivitajiet konġunti;
- l-imsieħba mhumiex biss dawk li jirċievu l-informazzjoni;
- l-attivitajiet kollaborattivi jirriżultaw f’riżultat tanġibbli.
Użu tat-teknoloġija:
- it-teknoloġija tintuża biex tgħin lill-imsieħba jiksbu l-għanijiet pedagoġiċi tagħhom;
- l-għodda jgħinu lill-imsieħba jikkollaboraw aħjar bejniethom.
Approċċi pedagoġiċi:
- il-proġett għandu oriġinalità f’termini tat-tema tiegħu;
- juża varjetà ta’ metodi pedagoġiċi;
- l-istudenti huma dawk li jieħdu l-inizjattiva;
- l-istudenti jinteraġixxu mal-imsieħba tagħhom u jaħdmu b’mod kollaborattiv billi jużaw metodi differenti bħall-ġbir tal-informazzjoni, is-soluzzjoni tal-problemi, ir-riċerka u x-xogħol komparattiv;
- l-istudenti jieħdu rwoli differenti bħala artisti, ġurnalisti, tekniċi, xjentisti, atturi eċċ.
Integrazzjoni Kurrikulari:
- il-proġett huwa msejjes fuq il-kurrikulu u s-sillabu tal-iskola;
- il-biċċa l-kbira tax-xogħol tal-proġett isir matul il-ħin tal-iskola;
- l-integrazzjoni kurrikulari fil-proġett hija ċara;
- xogħol ta’ proġett jippermetti lill-istudenti jiżviluppaw il-ħiliet u l-kompetenzi tagħhom;
- il-qafas pedagoġiku bbażat fuq il-proġett ġie spjegat u ddokumentat mill-għalliema.
Riżultati u dokumentazzjoni
Kun żgur li:
- ir-riżultati tal-proġett huma ppreżentati online;
- l-istudenti huma involuti fit-TwinSpace;
- il-passi kollha tal-proġett huma dokumentati, inkluż l-ippjanar, id-deskrizzjonijiet tal-attivitajiet, l-evalwazzjoni u l-feedback;
- inti tevalwa u tippubblika l-impatt li l-proġett kellu fuq l-istudenti u l-għalliema involuti fil-proġett;
- uża l-lista ta’ kontroll ta’ hawn taħt meta tippjana u timplimenta l-proġett tiegħek biex tiċċekkja jekk il-proġett tiegħek jissodisfax il-kriterji tal-QL.