L-innovazzjoni tista’ tfisser affarijiet differenti għal nies differenti. Il-biċċa l-kbira tan-nies jassoċjaw l-innovazzjoni man-novità, b’bidla fil-mod kif isiru l-affarijiet. U sabiex l-affarijiet jinbidlu, wieħed jeħtieġ li jżomm moħħ miftuħ. Fl-edukazzjoni, l-innovazzjoni spiss tintuża biex tirreferi għal ambjenti ta’ teknoloġija jew tagħlim. Madankollu, fuq kollox, l-innovazzjoni fl-edukazzjoni għandha tfisser flessibbiltà: ir-rieda li jiġu ppruvati approċċi u strateġiji ta’ tagħlim ġodda, bil-għan li jiġu pprovduti esperjenzi ta’ tagħlim aktar inklużivi u impenjattivi għall-istudenti kollha.

Negħlbu l-ostakli fl-innovazzjoni

L-istrateġiji ta’ innovazzjoni fil-livell tal-iskola u tal-klassi kienu tema fl-Istħarriġ Internazzjonali dwar it-Tagħlim u l-apprdendiment tal-OECD (TALIS) tal-2018. Filwaqt li l-biċċa l-kbira tal-għalliema fl-OECD qablu li huma miftuħa għall-bidla, il-ftuħ għall-innovazzjoni jidher li huwa aktar baxx f’ħafna pajjiżi Ewropej milli f’partijiet oħra tad-dinja. F’dan is-sens, l-offerta tal-awtonomija lill-għalliema tista’ tgħin fil-promozzjoni tal-kreattività u l-innovazzjoni fil-klassi. Madankollu, huwa importanti li l-għalliema jirċievu t-taħriġ meħtieġ mill-bidu, sabiex jiġi evitat it-teħid ta’ deċiżjonijiet ħżiena.

Kif issir għalliem innovattiv

L-iżvilupp professjonali kontinwu huwa kruċjali. L-għalliema jistgħu jiġu mħeġġa jieħdu sehem fi programmi ta’ tagħlim jew taħriġ barra mill-pajjiż permezz tal-programm Erasmus+, jew jissieħbu f’korsijiet online. Dawn il-korsijiet ta’ taħriġ jippermettu lill-għalliema jiskambjaw l-għarfien, jitgħallmu ħiliet ġodda, jakkwistaw prattiki tajbin u jiksbu perspettiva usa’ dwar l-edukazzjoni.

Riċerka ta’ azzjoni hija approċċ li jeħtieġ li l-għalliema jsiru ħassieba kritiċi u riflessivi ddedikati għat-titjib tal-esperjenza tat-tagħlim tal-istudenti. Tista’ tintuża biex issolvi kwistjonijiet ta’ kuljum fil-klassi bħal bidla fl-arranġament tas-siġġijiet biex tippermetti aktar tagħlim kollaborattiv.

Networks tal-għalliema, kemm kbar kif ukoll żgħar, jistgħu jkunu sorsi siewja ta’ ispirazzjoni. Fil-livell tal-iskola jew lokali, l-għalliema jistgħu jorganizzaw gruppi ta’ studju, osservazzjoni mill-pari riflessjoni konġunta. Networks akbar bħall-eTwinning jew Global Teaching InSights joffru bosta riżorsi u opportunitajiet għat-tkabbir professjonali u n-networking.